The Newah (नेपाल भासँ थःगु बिचाः प्वन्केगु हलिमे छगुहे जक नेवाः ब्लग् )

नेवाः बस्ती नेवाः स्कूलँ नेवाःमस्तेगु भविष्य देकीगु खःला?

नेपाल संवत ११२८ सिल्लागा ७ (सप्तमी) बिहिबाः
झी सकसिनँ म्हस्यूम्ह दीपक तुलाधर भाजुँ, नेपाल भासया शिक्षा प्रति यानादीगु देन् धात्थेँहे च्वछाय बहःजू। “नेवाः बस्ती नेवाः स्कूल” धैगु अभियान धात्थेँहे बाँला। थउँ, येँ, यल, किपू जक मखु ख्वपय् नँ नेवाः मोडःन् स्कूल् चायकेगु ज्या वयकः व वयकः नापँ स्वापुदुपिँ पासापिसँ यानादिल। झी “दनेवाः” पाखेँ वयकःपिनिगु ज्या बाँलाना वनेमा धका दुनुगलँनिसेँ भीँतुना च्वना। नापँ कूँ ख्येनानं , छगुनिगु सल्लानं न्ह्यथना च्वना। झी नेवाःत धैपिँ बाँलायमा बाँमलायमा, प्रसंशा याइगुहे दक्वसियाँ यः। मिले मजूसाँ, मिले मजू धायके मयः। आ छुयायगु, झी “दनेवाः” परिवारधाःसा, तप्यँक खँ ल्हाइगु , मिले मजूथाय् मिले मजू धका कुँख्यनेगु , मिलेजू थाय् मिलेजू धका प्रसंशा यायगु ज्याय दक्कोसिबे न्हापालाका च्वना। ज्यू मज्यू , यः मयः धायगु , बिचायायगु , थुईका कायगु मकायगु छिकपिनि जिम्माय् ।

नेवाः बस्ती नेवाः मोडःन् स्कूलया ज्या तस्कँहे बाँला धका, च्वय च्वछाय् धुन। आ कूँख्येने तेना। तँ मचाःसे ब्वनादिसँ न्हाँ जिमिगु खँनँ।
१) दकले न्हापाँ “नेवाः बस्ती नेवाः मोडर्न स्कूल” धैगु नाराहे भचा ल्वाकःबुकःथेँच्वँ। नेपाल भास, खस भास व अंग्रेज भासया खँग्वत ल्वाकज्याः। उलितक्क झीसँ थःगु माँभास हे मसयधुंकल। झी अप्वःयाना अज्योपिँहे, हला? छिकपिसँनं चाःलाथेँ? अयसाँ, झी छम्ह छम्हेसिनँ गुलिसः उलि मेपिन्तः स्यनाबिल, न्यंकाबिल, इनाबिल धासा, झी सकलेँ न्हापास्वया भचासाँ आपा सयावइ। उकेँ, “नेवाः बस्ती नेवाः मोडर्न स्कूल” या पलेसा “नेवाः लागाय् नेवाः मोडर्न स्कूल” धायगु याःसा, भतिचासाँ नेवाःपह वइला धका बिचायाना सल्ला न्ह्यथना च्वना। जिमिसँनं उलि स्यूगुला मखु। अयनं, स्यूगु खँ छता जकजूसाँ ज्यावइला धका थन च्वया च्वना।

२) अले, नेवाः लागाय् नेवाः स्कूलय् ब्वन्कीगु शिक्षाया माध्यम स्वयबलेला, अंग्रेज व खस भासँ ब्वन्केगुनँ पायछि हे जू। अयनं, झीगु माँभास नेपाल भास ब्वन्कीबले देवनागर आखः छेलाच्वन धागु न्यना अजुगति चायाच्वना। गनँ, गनँ रञ्जना आखः छेला च्वन धैगुनँ न्यना। फुक्कँ बाँ हे लाःधायमाः। अयनँ, छगु खँ छु धाःसा, झीसँ दकले न्हापाँ सयके माःगु छुधका मस्तेतः न्हापाँनिसे स्येनामतल धाःसा, आयापि झीपीसँ प्रचलित आखःसयकेत थाकुचाइथेँ, इपीँनं थाकु चायफु। आ जिँ, जिमि अबु प्रोफेशर धाम्हेसितः “न्हापाँनिसेँ जितः प्रचलित लिपि स्यनातय् म्वाला बाः? ” धका न्यनेथेँ न्यने माली मखु। अयनँ पासापिनिगु संगतँ, ३० दँ पिनेच्वना च्वँसाँ प्रचलित लिपि सयकेत उलि समय मकाल। अल्सिम्ह जिँहेँ छवाःयादुने सयका कया। सोरि न्हाँ, जिगु खँ ल्हायलातकि मदन् कृष्ण दाइ स्वया म्हो जुइमखु जिनँ।

३) झीगु सल्ला। जिमिसँ सल्लाला बीमागु मखु। अयनं, मखनाँ च्वंगु खँ, खंका ब्यूसा बाँलाइला धका बिचा जुल। व छु धाःसा, झीसँ प्रचलित लिपि छेलाहयमाल। छेँ छेँ पतिकँ, सरकारि, व्यवसाय अफिसे, पसःपसले, अले स्कुले, झीसँ प्रचलित लिपि छेलाहयमाल। नेवाः स्कुले जक मखु नेवाः मस्त गन छु स्कुले दु, अननँ प्रचलित लिपि छेला, नेपाल भास ब्वन्केगु सुविधा बीगु, मदुसा बीकेगु यायमाल।

प्रचलित लिपि धैगु, झीगु नेपाल भास जक मखु, संस्कृत भास च्वयतःहे छेलाःतःगु दु। व जक मखु, खस विद्वानपिनि दुनेहे, प्रचलित लिपिँ खस भासनं च्वयमा धाइपिँहे दु। स्वइदिसँ पासापिँ, देवनागर लिपि धैगु झीगु मखु। झीगु आखःला प्रचलित लिपि खः। साधारण ज्ञाणया लागी दूगु लिपिखः, प्रचलित लिपि धैगु। अले रञ्जना लिपिधैगु बुद्धया उपदेश, धम्म विनय, दर्शन, कला इत्यादी च्वयातःगु लिपि खः। थउँया भासँ धायमाःसा, केजी निसेँ विश्व विद्यालय तक्क प्रचलित् लिपिया आखः छेला ब्वनेगु, ब्वन्केगु। अले, बुद्ध दर्शन, कला शास्त्र, इत्यादि विषयया च्वथ्यंक अध्ययन यायतः रञ्जना आखः सयकेगु, छेलेगु यायथेँ खः। उकेँ, नेपाल भासया शिक्षा थउँया मस्तेतः बाँलाक्क ब्वन्का, कन्हेया नेपाःदेः देकेफुपिँ, देकेतः मन् तइपिँ मस्त हुर्के यायफतधाःसा दीपक तुलाधरथेँ जापिँ झी विशिष्ठ पासापिनिगु कुतः या फलदइ। अथेमखुसा, समय व धेबाया बरबात जक जुइ।

झीसँ मस्यूगु सयका, स्यूगु स्यना यंकेनु। झीगु भास, नेपालि (खस भास, खय् भाय् ) भास मखु। झीगु भासला, नेपाल भास (नेपाः भाय्, नेवाः भाय्) खः। इन्डियाँ वःगु देवनागर लिपि, झीगु लिपि मखु। झीगु लिपिला द्वलँदँ पुलाँगु इतिहास दूगु प्रचलित लिपि, रञ्जना लिपि खः। नेपाःया दकले न्हापांगु नेपाल भास माध्यमया स्कूल जगत सुन्दर ब्वने कुथिँ, मस्तेतः, प्रचलित लिपि, रञ्जना लिपिँ नेपाल भास, साहित्य व संस्कृति स्यना च्वंगुदु। व स्कूल नापँ सहलह याना दिल धाःसा “नेवाः लागाय् नेवाः स्कुल” या अभियाननं न्याक्कहे बाँलायफु। थुज्वोगु अभियान बाँलाना वन धाःसा नेवाः समाजया भविष्य अवश्यनं बाँलाइ धैगु विश्वास याना च्वना।
- झी “दनेवाः”

थुकी छिगु प्रतिकृया दुसा, थन क्वसँ छिगु Comment च्वया दिसँ।

नेपाल संवत ११२८ सिल्लाथ्व १५ (सिपुन्ही) बिहिबाः

थउँ माँभासया अन्तर्राष्ट्रीय न्हि। माँभासया मतलब् झी नेवाःतेतः दुला?

माँभासयात राष्ट्र भासया रूपे हनेमा धका जुलुस वना थःगु ज्यानहे पाःपिनिगु सम्माने, संयुक्त राष्ट्र संघया घोषणाकथँ, थउँ “माँभासतय् अन्तर्राट्रीय दीँ (International Day of Mother languages)” खः। व जक मखु थ्वदँ (सन् २००८ ला) “माँभासतय् अन्तर्राट्रीय दँ (International Year of Mother Languages,-2008″ ) हे घोषणा जूगु दु।”Languages Matter! (भासाया मतलब दु!) धैगु नाराय् सन् २००८ यंक बिस्कँ ज्याझ्वः न्ह्यकीगु दु। संयुक्त राष्ट्र संघया पहले ९ (गुँ) दँ न्ह्यवःनिसेँ, संसारया चीचीधंगु समुदायया जनवर्गतयगु माँभासया संरक्षण व उत्थानया उद्देष्यकथँ न्ह्याकूगु थ्व विश्व अभियानँ, न्हनावने त्यंगु चीचीधंगु समुदायया माँभासत छेलेतः प्रोत्साहन बियावया च्वंगु दु।

थनँ ५६दँ न्ह्यवः (सन् १९५२ फेब्रूवरि २१कुन्हु) बन्गलादेसीतयसँ थःगु माँभासया लागी ज्यान पाःगु न्हियात अनुस्मरणयायगुथँ, संयुक्त राष्ट्र संघया युनेस्कोँ थनी ९(गुँ)दँ न्ह्यवया फेब्रूवरि २१कुन्हु “माँभासया अन्तर्राष्ट्रीय न्हि” घोषणा यागु खः। अनँ, वंगु सालया मे १६ कुन्हु जूगु संयुक्त राष्ट्र संघया महासभाँ सन् २००८ सालयात “माँ भासया अन्तर्राष्ट्रीय दँ (International Year of Mother Languages,-2008) ” कथँ हनेतः घोषणा यागु खः ।

(१९५२ सालय् बेन्गालितेसँ थःगु माँभासयात राष्ट्र भास यायमा धका ढाका शहरे पिहाँ वःगु जुलुस)

“Languages Matter! Even for Newahs? धका न्ह्यसः छगुला झीगु न्ह्यःने धस्वाक्क हे दँहेवइ। छायधाःसा, झी नेवाःतयसँ झीगु माँभासयात बीमागु प्राथमिकता बीमफुनि।खँ थूपिनिगु लागीला तसकँहे मछासे च्वन्गु खँ। मथूपिनिगु लागी छुँ मतलब् मदैगु स्वाभाविक धायगु बिनाँ, मेगु छुधायगु ? खःजा नेवाः भासजवाः, साहित्यकार, च्वमि गुरुपिसँ नेपाल भासया उत्थानया लागी ज्यासँपिँ मदुगु मखु। छु दु व जक, छुखेँ ज्यू उकियात जक छेला हया च्वन। तर ज्यापूवंक यायगु, बाँलाक्क यायगु धैगु न्हापाया नेवाःतेकेदूगु मेन्टायलिटियात छु जुयावन? झी नेवाःतेगु माँ भास “नेपाल भास” यात खय् तेगु भासँहे थःत थःम्हँ “नेवार, नेवारी” धका अपमान याना च्वंगु दु। झीपिँ नेवाः जाती (Newah Nation) या मनूत, झीगु माँभास नेपाल भास “Nepal Bhasa” यात, नेवार भाषा धका थःपिँसँ हे धयावया च्वंगु थःपिसँ हे मचाले धुंकूबलेला, झीगु भाय थ्वका वका धाःसाँ थुइगु हे मखे धुंकल।चाला छिकपिसँ? झीगु भासया थःगुहे लिपित दु। प्रचलित, रञ्जना, भुजिँगोल इत्यादी। प्रचलित धयागु Standard, well-known, well-used धैगु अर्थ मस्यूगुला, स्यूसाँ मस्यूपह याना च्वंगुला ? वला थःम्हँ हे जक स्यू।

इन्डियाँ वःगु, विक्रम संवतया पलेसा, झीगुहे देसया नामँदूगु नेपाल संवत छेला हयमाल, इन्डियाँ वःगु देवनागर आखःया पलेसा झीगुहे प्रचलित आखःयात छेला हयमाल। कतपिनिगु संवत, कतपिनिगु आखःयात गुलि माया यायगु? झीगु संवत, झीगु लिपियातनं भतीचा जूसाँ माया यायमाल। अलेतिनि, झीगु अस्तित्व दइ।मखुसा, झीपि न्ह्याबलेँ हे ल्यूने लाका च्वनेमाली न्हाँ। झी नेवाःत, खसभास, हिन्दी, उर्दु, अंग्रेजी जक मखु आला, फ्रेन्च्, जपानी, एस्पेरान्तो सःपीँहे दया वय् धुन्कल। गुलिँला एस्पेरान्तो भास देःदेसे वना स्यँ वनीपिँ हे दया वयधुंकल। अथे सःस्यूपिँ नेवाःतेके, विदेसितयसँ “अले छिकपिनिगु भास छुले?” धका न्यनीबले, जिमिगु भास “नेपाली” धाइपिँ नेवाःतयतः, नेवाःतेगु भासला “नेपाल भास” धका स्यूपिँ विदेसितनँ दयावयधुंकूगु खँ, जि व भास सः थ्व भास सः धका धमण्ड यायगु नाप नापँ, जि थःगु माँ भास, नेपाल भास, थःगु भासया लिपि च्वयसः धकानं गर्व तायकूसाजक, विदेसितय् न्ह्यःने इमिगु भास सःगुया मतलब् दइ।मखुसा थःगु न्ह्याय् थःम्हँतुँ धेनेगु सिबाय् छुपाइ? “म्हँ छम्हँ तःले लाकाः, तुतिनिपा जक द्यःने तया, “जि द्यःने, जि द्यःने ” धाइगु उखान लुमँस्य वयका बीपिँ विद्वानत थेँ जुइन्हाँ।

झी सकस्याँ वाःचायकेगु खःसा, संयुक्त राष्ट्र संघया युनेस्कोया पहले न्ह्याःवःगु, थ्व “माँ भासया अन्तर्राष्ट्रीय दँ २००८” यात सफल यायतः, झीसँनँ झीगु भासया अस्तित्व ल्यनीगु ज्याछता यायनु। व खः झीगु प्रचलित लिपियात छेलेगु, प्रचलित लिपिया युनिकोड फोन्ट् दयका हलिमे सकसितँ इनाबीनु। छिनँ गुहालि यानादी न्ह्याःसा स्वापु तयादिसँ।
-झी “दनेवाः”
(किपाः सुभाय् - नेपालसञ्चारडट्कम्)

छिगु प्रतिकृया थन क्वसँ च्वंगु comment सँ च्वयादिसँ।

तिमिलाथेँ थीगु खड्ग नेपाः राष्ट्रीय पार्टिया चुनाव चीँ
“झी छपँ जुइमा” धैगु अज्ञाणया अन्धकारयात नाशयाना बी ?

ने. सं. ११२८ सिल्लाथ्व ६ (षष्थि) सोमबाः
येँ, नेपाः मण्डः

झी नेवाःत सुयातँ ल्हाःफय् म्वापिँ, गुलिसिया बाज्या, अबुपिसँ कमेयाना थकूगु धन सम्पत्ति मोज यायदुपिँ, गुलिसिया मेगु छूँमदुसाँ, स्वाने छपुजक जूसाँन्ह्यंगु बाकुयानातःगु छेँ छकुसाँ दु। न्ह्यागुसाँ स्वछाः नयदु। अले छाय् माल दाजु किजापिनिगु एकता, छायमाल त्वाःत्वाःया पासाभाइ पिनिगु मित्रता, छुयायतः नेवाःत छपँ जुइगु? थःगु पुलाँगु छेँ इन्डियन् साहुतयतः बालँ बीगु वा मिया छोयदतकि, न्हूथाय् तःखागु छेँ दयके फत धासा गाहे गानी। अले छायमाल दाजु किजापिनिगु एकता, छायमाल त्वाःत्वाःया पासाभाइ पिनिगु मित्रता, छुयायतः नेवाःत छपँ जुइगु?

भासजवापिनिगु छेँहे मल्हाइगु नेपाल भासला सिना गनथेने धुन्कल। अथेसाँ वाःचायकूपिँ मध्येसुनाँनँ “नेवाःतयगु बास्ति मदयावनीन न्हाँ, संस्कृति न्हना वनीन न्हाँ” धका धन्दाकया धासाँनँ, “छु हाला च्वना नेवाः नेवाः धका, हालाँ छुयाय् जिमितः सुनाँ नकः वई? जिमितला, जाकिहिँ, मतःचिकँ हिँ, उलिदःसाला गाहेगानि।”

येँया दुने, ईन्डियन केरा साहुतनिसेँ कम्पनिया मालिकतयसँ घेरेयाय धुंकल। स्वयम्भुया च्वसँ सँय् न्हूसाहुतयसँ बस्तियाय् धुन्कल। क्वय् मुस्मातयगु सीःगारेयाय थाय् जुइधुन्कल। बहनी भ्वय् वना लिहाँवइबले भचालिबातकि पुलिसँ ख्याइगु , अले आला न्हिनेहे लुटेयावःसाँ छुँ यायमफुपिँ नेवाःतयत, भचासाँ उत्थान यायगु धैगु उद्देश्य ज्वना, उखुनुतिनि पलिस्था जूगु नेपाः राष्ट्रीय पार्टिया प्रगति च्वछाय् बहकथँ न्ह्याना वयाच्वन्गु दु।
पार्टिया रेजिष्ट्रेषन् नापँ, मागकथँ चुनाव चीँ, खड्ग हे प्राप्त जुल। झीगु नेपाल मण्डले वासयोग्य याना बिज्याम्ह मञ्जुश्री बोधिसत्वया जवल्हाती ज्वना बिज्याइगु खड्ग, तिमिलाथेँ थीगु खड्गँ, अज्ञानया अन्धकारयात नाशयाना, ज्ञाणया जःकेना बीथेँ, नेरापानँ “झी छपँ जुइमा” धैगु अज्ञाणया अन्धकारयात नाशयाना बीला धैगु झीगु आशायात पुरेयाय फयेमा।

वंगु शनिबाः कुन्हु यलय, नेरापाया दाँभरि झी सुरेश प्रधान भाजुया संयोजक्त्वय् ललितपुर तदर्थ समिति स्वनेगु ज्या, नेरापाया प्रगति पाखे ल्ह्वना च्वन्गु न्हूगु पला धायमा। आः थनँ लिपा ख्वप, ख्वपासि, भोत, पनौति नापँ नेपाःया ७५ (न्हेःन्यागु) जिल्लाय् नेरापाया शाखा समिति खोलेयाय फयकेमा। नेरापाया उद्देष्य नेपाल मण्डले च्वपिँ नेवाःतेगु उत्थानया लागी जक मखुसे, नेपाल देस भरिहे च्वँपि नेवाःतयगु उत्थान यायगु लक्ष जुइमा, मखुसा नेरापा नेपाःगालेहे तनावनी।

अले, नेवाः समुदाय जक मखुसे मेमेपिँनिगु समुदाय नापँनँ झीगु स्वापु बल्लाकेमा। अयनँ छगु मिस्टेक छुयाय मज्यू धासा, झीथाय् नेवाःत जक मखु मेमेपिँनँ समुदाय दु धायवँ, इमितःनँ झीसँ दयकेगु तदर्थ समिती दुथ्याकेमा धका झीगु पार्टी दुथ्याके मज्यू। नेवाः मखुपिँ, थुखेनें थ्या, उखेनँ थ्या। इमि इमिहे संस्था दु, पार्टि दु। नेवाःतेसँ थःगु तुतिँ न्हापालाक्क चुइफयकेमा। अले मेपिन्तनँ गुहालि यायगु बाँलाइ। अथेमखुसा, नेवाःतेतः थगु थायहे मदया वनी न्हाँ। नेवाः मखुपिँ पासापापिन्त झीगु पार्टि दुकायगु पलेसा, इमिगु संघ संस्था वा पार्टिलिसे नेशानल एलाएन्स् दयका नेपाल मण्डलया नापनापँ विशाल नेपालयात लीड याय् फयकेमा। मखुसा नेपाः, देस निर्माण याना थकूपीँ झी बाज्या बराजुपिसँ जक मखु भविष्य नेवाः जेनेरेःशनतयसँनँ झीत सराःबीफु। सकसिनँ वाःचायकेगु ई थ्वहे मखुला?
(किपाः सुभाय् - १)खड्ग - पूज्य यिन् झी शाक्य, ओहायो; २)मञ्जुश्री - आःहन्डिक्राफ्ट्डटकम्
- झी “दनेवाः”

छिगु प्रतिकृया दुसा थनँ क्वसँ च्वन्गु comment सँ च्वयादिसँ।

जुजुँ विरोधयात - राजतन्त्र लिकना छोयगु प्रजातान्त्रिक् मजू

ने. सं. ११२८ पोहेलागा १५ (अमाइ) बिहिबाः
येँ, नेपाः मण्डः

“६ (खुगू) दलत व माओवादीँ दयकूगु अन्तरिम सरकारँ राजतन्त्र लिकना छोयतः यागु निर्णय, अन्तरिम संविधानय गणतन्त्र धका प्रष्‍ट याना तःसाँनँ, थ्वला बहुसंख्याया नेपाःमि नागरिकतयगु भावना बिपरित। छुँ दलया नेतातेसँ जक देःया राज्य ब्यवस्थाया निर्णय यायगु खँहे प्रजातान्त्रिक मजू।” वंगु सोमबाःखुनु नाराँहिटि दरबारे, जपानि पत्रकार छठ्वःयात जुजु ज्ञानेन्द्रँ ब्यूगु अन्तर्वार्ताय् अथे धयातःगुदु। जपानया नाँजाःगु अखबार योमिउरि जपानि व अंग्रेजि एडिशने पिहाँवःगु बुखँकथँ, “थनया परिस्थिति अन्तराष्‍ट्रिय समुदाय नापँ बाँलाक्क् थुइकेमा। राजतन्त्र तयगु मतयगु खँ निर्णय यायगु अधिकार जनतायाके दु। गुगु अधिकारया प्रयोग जनता थःथःपिसँ यायमा। बहुसंख्याया जनतातय बिचे, आःनँ राजतन्त्र अत्यावश्यक धका धाइपिँ दु धका जिगु विश्वास दु। आः थ्व परिवर्तित समय खः। अएनँ ई त्यलकि व हाकुगु सुपाँयचाय् ज्वःगु किरण् पिहाँवय् फयमा धका आशा याना च्वना।”

“बहुसंख्याया नेपामितेतः थःगु बिचाकथँ, नवाय् फूगु अवस्था मदु। राजनीतिया थलो जुयाच्वन्गु येँ जक नेपाः मखु । हिमाल, पहाड व तराइया जनताया सः आतक्क् न्यने मदुनि। राजनैतिक व्यवस्था धैगु ग्रास रुट लेबलँनिसेँ बल्लाके मा। एप्रिल १० तारिके ग्वसाः ग्वयातःगु संविधान सभाया चुनावय् सकल जनताया थःगु अधिकार प्रयोग याय पावय् जुइमा। स्वतन्त्र, धांधली मदुगु, शान्ति व सुरक्षाया बातावरणय् चुनाव यायमा। यदि थुजोगु वातावरण श्रृजना यायमफुसा चुनाव यायगु संभव जुइमखु जुइ। स्वय् गथेजुई।”

“आःयागु अन्तरिम सरकारया ज्या छगुहे बाँलागु मदु धैगु न्यना । अपसोचया खँ। बिशेषयाना नियम् कानुनया पालना मदु। देः अव्यवस्थित जुयाच्वन्गु न्यना। न्हापाया नेपाः तसकँ शान्त। आःथैँ तनाव ग्रस्त मजू्। अन्तरिम सरकारया नेताते बिचे, नेपाःया सांस्कृतिक, सामाजिक व परम्पराया महत्वया बिरुद्ध ज्यायाइपिनिगु ज्या ज्यू मज्यू धकानँ थुइका काय् फयकेमा।”

अन्तर्वार्ताय् जपानया विषयले नवाःसे, “जपानया सम्राट व साम्राज्ञीया उत्तरोत्तर प्रगतिया कामना याना भिन्तुना नापँ जपानि नागरिकतेतः थःगु दुनुगलँ निसेँ मैत्रीपुर्ण अभिवादन् याना सुभाय बियाच्वना” धैगु खँनँ योमोउरि अखबारे च्वयातःगु दु।

थउँया बुखँला, झी “दनेवाः” पिहाँवय् धुन्काया दकले ताहाकःगु बुखँ जुयाबिल। जुजुया सः , बिचाः न्यने आयबुया च्वँपिँ गुलिनँ दयफु इमिबिचे जुजुवादितनँ विरोधितनँ दयफु। नेपाःमि झी सकसिगु सुभेच्छाला, छम्हेसिया जक, छगु जातिया जक, छगु धर्म व छगु जक भासया सुरक्षा व उत्थान जक मखुसे सकल जाति, धर्म व भासया नेपाःमि सकसिया सुरक्षा व उत्थान जुया शान्तिपुर्णकथँ जीवन हने दयमा धैगु हे जक खः। जनता प्रति देमागु थुजोगु कर्तब्य, पावर दुबले सकस्याँ लोमनीगु्। (किपाः सुभाय् - नेपालन्यूजडटकम्)
- झी “दनेवाः”

छिगु प्रतिकृया थनँ क्वसँ च्वन्गु comment सँ च्वयादिसँ।

Jwojalapa! Welcome to News from other links for your reading pleasure. The column was last updated on 9 Dev. 1129 (2008).

नेपाल सम्वत ११२९ को उपलक्ष्यमा नेपाः पासा पुचः अमेरिकाको कार्यत्रम
राजेन्द्र समन
नेपाल संवत ११२९ को उपलक्षमा नेपाः पासा पुचः अमेरिकाले नोवेम्बर ८, २००८ का दिन एक कार्यत्रमको आयोजना गरेको थियो। नेपालका महामहिम राजदुत डा. शुरेश चन्द्र चालिसेले पानसमा बत्ति बालेर कार्यक्रमको उद्घाटन गर्नुभएको थियो ।
उक्त कार्यत्रममा नेपालका बरिष्ठ हास्य कलाकार मदन कृष्ण श्रेष्ठ लाई नेपाः पासा पुचःका सस्थांपक अध्यक्ष राम मालाकारले पासाः पुचःको टोपी लगाई सम्मान गरिएका थियो। More

लुम्बिनी बिकास कोषको सदस्य सचिव पदमा शेर्पा नियुक्त
माओबादी नेत्रित्व रहेको गठबन्धन सरकारको हालै बसेको मन्त्रि परिसदको निर्णयले बिभिन्न बिभागहरुमा सामबेशि पद पुर्ति गरेका छन। यसै गरि लुम्बिनि बिकास कोषको सदस्य सचिव पदमा आचार्य कर्मा साङपो शेर्पालाई नियुक्त गरेको छन। दोलखा जिल्ला बिगु गा बि स स्थाई घर भएको आचार्य शेर्पा नेपाल बौद्ध महासंघका महा सचिव समेत हुनु हुन्छ। बिगतलामो समयदेखि गैर बौद्ध धर्मवलम्विहरुले पदभर सम्हालदै आएको लुम्बिनि बिकास कोषमा मावोबादी नेत्रित्वको गठबन्धन सरकारले पहिलो पटक बौद्धमार्गि समुदायको ब्यक्तिलाई नियुक्त गरिएको हो। Full Story

हिमाली युवा मन्च केन्द्रिय समितिद्वारा रसुवामा कार्यक्रम
रसुवा अक्टोबर ११ का दिन हिमाली युवा मन्च केन्द्रिय समितिद्वारा रसुवा जिल्लाको स्याब्रु बेँसिमा एक औपचरिक कार्यक्रमका बिच जिल्ला अन्तर्क्रिया भेला सम्पन्न गरेको छ। स्याब्रुबेँसिका बिधालय सन्चालक समितिको अध्यक्ष तथा समाजसेवि नुर्भु तामाङगको सभापतित्वमा सम्पन्न भयो। Full Story

टोक्योमा विश्व आदिवासी दिवस मनाइयो
विश्वका ३५ करोड आदिवासी जनसमूहको मानव अधिकार, मातृभाषा, संस्कृति र आदिवासस्थानको सम्वर्धन र संरक्षणको लागि संयुक्त राष्ट्र संघद्वारा घोषित विश्व आदिवासी दिवस, टोक्योमा “विश्व आदिवासी दिवस-नेपालको सन्दर्भमा” कार्यपत्र प्रस्तुति र अन्तर्क्रिया कार्यक्रम को साथै क्वाटी भोजको आयोजन गरी शनिवार मनाइयो। Full Story

बुद्ध सम्बन्धि हुलाक टिकटमा प्रथम टाँचा
हुलाक सेवा विभागले शुक्रबारदेखि प्रचलनमा ल्याएको ‘बुद्ध जन्म’सम्बन्धी हुलाक टिकटमा सूचना तथा सञ्चार मन्त्रालयका सचिव युवराज पाण्डेले शुक्रबार प्रथम दिवसीय टाँचा लगाउनुभयो। शान्तिका अग्रदूत भगवान् गौतमबुद्धको जन्मस्थान लुम्बिनीको प्रचार-प्रसारबाट विश्वमा फैलिरहेको अशान्तिबाट सिर्जित मानव कष्टबाट उन्मुक्ति पाउन सबैलाई प्रेरणा प्राप्त होस् र पर्यटन प्रवर्द्धनमा समेत टेवा पुगोस् भन्ने उद्देश्यले सो टिकट प्रकाशनमा ल्याएको उक्त विभागले जनाएको छ । Full Story

येँ, नेपाः मण्डः (नेपाल मण्डल)
ने.सं. ११२८ पोहेलागा १३ (त्रयोदशी) मंगल् बाः

नेवाः जातिया दुने जातपात, तःधँचीधँया भेदभावँ याना मखुला, “खिचा ल्वाई थेँ ल्वाइगु” धैगु उखान दया च्वन्गु?

२१औँ शताब्दि जुइधुन्कल। आला झीगु देसेनँ भउचियात मायाँ याइपिँ खिचातेगु जन्मनँ जुइ त्यलथेँ च्वँ, मत्यःनिला?

तोःक्योःवासि झी पासा छम्हेसिनँ छोयाहःगु वीडियो क्लिप्। थुकीया मेगु भागनँ पिहाँवयफु।
- झी “दनेवाः”

छिगु प्रतिकृया च्वयतः थन क्वसँ च्वन्गु Comment चायका दिसँ।

येँ, नेपाः मण्डः (नेपाल मण्डल)
ने.सं.११२८ पोहेलागा १२ (द्वादशी निन्हु) सोम् बाः

नेपाःया राजधानि येँया राजदरवार, लैनचौरय प्रधान मन्त्रि क्वाटर, यलय् मन्त्रि क्वाटर दुथाय् , विभिन्न पार्टि नायःतयगु छेँत, अले मारवारी साहुतयगु छेँत, सँय् तयगु ठमेलया होटेलत व झेल्या बर्मू क्षेत्रितयगु छेँत बाहेक, मेथाय सकभनँ सुथय् सु न्हापानँ दनाः मिशिनँ लः सालीगु, सुया मिशिन् पावरफुल् , वयागु छेँ सुथय जकजूसाँ लः वईगु, गनँ ट्यान्करया लःहे न्याय् मागु, झीगु थ्व स्वनिगः येँ, यल, ख्वपय् , म्हिगःनिसेँ लःया प्रबन्धयायगु ज्या, झी भौतिक योजना मन्त्री हिसिला यमि मयजुँ काठमाण्डु भ्यालि खानेपानि संचालक बोःड्(KVWMB) व काठमाण्डु भ्यालि खानेपानि कम्पनि लिमिटेड(KVDWCL) यात लःल्हाना दिल।

कम्पनि जुइमा, संघ संस्था जक मखु देसया संचालकहे जुइमा, परिवर्तनया उद्देष्यला, संचालनया ज्या बाँलाकेतःहे खः। खानेपानी संस्थाया संचालकतयगु परिवर्तनया आवश्यकतानँ, स्वनिगःले च्वँपिन्तः याकनँ लःया प्रबन्ध यायतहे जुइमा।

खःजा नेपाःदेः, लःया धनि देः धका धाई। अयनँ, येँ च्वँपिन्तःहे सकसितँ समानरूपँ, युक्तिरूपँ लःया सप्लाई यायमफुनि। लःया अभावया कारण छुखः धका बाँलाक्क सीका, देस् नरेस् या परिवर्तन वःगु, थ्व देः नेपाःया राजधानी, आ थ्व न्हूपिँ संचालकतयसँ लःया (सप्लाइया) अभावया समस्यायात याकनँ समाधान याना, स्वनिगःवासीतयतः लःया प्रबन्ध याइगु खःला, स्वयगु ल्यँहेः दनि।

छिगु प्रतिकृया च्वयतः थनँ क्वसँच्वन्गु comment क्लिक् याना दिसँ।