Dec. 09, 2008
Tokyo - Nepal Samvat is now the National calendar of Nepal. The new government recognized it after years of lobbying by its advocates. The majority of these advocates were from Newar community, to the extent that the opponents mistook it to be a Newar Samvat. So said the Nepal Ambassador for Japan, Dr. Ganesh Yonjan Tamang at an interaction programme and party held in Tokyo on 7th Dec. in celebration of the Nepal government’s decision to have recognized the Nepal calendar. Ambassador Tamang further said we may need to consult the experts if we have problems to understand the lunar calendar. But we should be happy about the government’s decision and make every efforts to make use of the calendar in our daily life. More in Nepal Bhasa.
राष्ट्रीय संवतकथँ मान्यता प्राप्त नेपाल संवतयातः व्यवहारे छ्यलेमाः- राज्यदूत डा. गणेश योञ्जन तामाङ
नेपाल संवत ११२९ थिंला थ्व११ (एकादशी)
तोःक्योः – “नेपाले परापूर्वकालँ निसेँ छेला हया च्वंगु नेपाल संवतयात नेवाःसमुदायँ अविछिन्नरूपँ छेलाहया च्वंगुलि थथे राष्ट्रीय मान्येत दत। नेपाल संवतयातः राष्ट्रीय संवतकथँ सरकारँ ब्यूगु थ्व मान्यतायात झी नेपाःमित सकसिनं ब्यबहारे छेलेमाः। मसः मथूसा, प्राविधिक विशेषज्ञतेगु सरसल्लाह, बहस व छलफलयायेमाः। बहुजातीय, बहु भाषिक देस झीगु नेपाःले थीथी जातिया दथुइ थःथः सहलह यायेमाः। थथे यायेगुहे न्हूँगु नेपाः निर्माणयात तिबः जुवनेफु।“ नेपाल संवतयात न्हूँगु नेपाल सरकारँ राष्ट्रीय मान्यता ब्यूगु लासताय् नेवा: जागरण मञ्च जपान व दिदिबहिनी समाजया संयुक्त ग्वसाले थ्वहे डिसेम्बर ७ आइतवाःकुन्हु तोःक्योः नाकामेगुरोया तिहार दाइनिङ सभाहःले अन्तर्कृया व खुशीयाली भोय् झःझः धायेक हंगु ज्याझ्वले मूपाहाँ जुयादीम्ह, नेपाल राज्यदूत महामहिम डा.गणेश योन्जन तामाङगँ अथै धयादीगु खः।
नेपाल संवतयात राष्ट्रीय संवत मान्यता ब्यूगु नेपाल सरकारया निर्णययात सम्माननीय प्रधान मंन्त्री पुष्प कमल दहालँ यानादीगु सार्वजनिक घोषणाया वीडियो प्रशारण यासे न्ह्याःगु थ्व ज्याझ्वले, नेपाल संवतयात राष्ट्रीय संवतकथँ मान्यता प्राप्त यायेगु लागी गुलिसिनँ गुज्वःगु दुखः कष्ट नयेमाःगु खँ निसेँ, न्हूँगु सरकारँ ब्यूगु राष्ट्रीय मान्यता द्वारा नेपाल संवतया पुनः प्रतिष्ठित जूगु तक्कया सन्दर्भ यात कया, नेवा: जागरण मन्च जापानया मूसल्लाहकार, बहु जातीय समाज विशेषज्ञ एवं मानव अधिकारकर्मि सुवन् वज्राचार्यँ चिनाखैये परिणतयाना यानादीगु लसकुस न्वचूया ल्यू, जपाने कार्यशिल जुयाच्वंगु नेपाःमि संघ संगठनया पदाधिकारिपिसँ भिन्तुनाया हसना देछाया दिल।
गैर आवासीय नेपाःमि संगठन जपानया अध्यक्ष भबन भट्टँ नेपाल बहु भाषी, बहुजाती देश जूगुली नेपाःमित छप्पँजुया पला न्ह्याकेफत धाःसा राष्ट्र बिकासे तःधंगु देन जुइगु खँ न्ह्यथना दिल। नेवा:अन्तर्राष्ट्रीय फोरम जपानया महासचिव दिनेश मानन्धरँ राष्ट्रीय मान्यता प्राप्तजूगु नेपाल संवतयातः व्यवहारे छ्येलेमाःगु व उकीया शुरुवात जपाने राज्यदूतावासया पत्राचारे नेपाल संवत तया शुरुजुइगु आशा तईदिल। नेपाल जनसंपर्क समिति जपानया अध्यक्ष महेश कुमार श्रेष्ठँ निरंकुश शासनकाले नेपाल संवत ज्याझ्वः आन्दोलनकथँ हनेगु यानाच्वंगु व ब्वतिकाःपिन्तः पुलिसँ ज्वनायंकीगु । लोकतन्त्र वसाँनिसे, भु.पु. प्रधान मन्त्री कृष्ण प्रशाद भट्टराईनँ शन्खधर शाख्वायात राष्ट्रीय विभूतिया मान्यता बिल। आःवया राष्ट्रीय संवतकथँ घोषणा यागु खँय् लसता प्वंकादिसे, नेपाल संवतयातः भोँटेजक सीमित याना मतःसे ब्यवहारेहे छ्येलेमा धका धइदिल। दिदी बहिनी समाजया महासचिव सुवर्णलता तुलाधरँ नेपाल संवतयात राष्ट्रीय संवतकथँ मान्यता ब्यूगुलि लसकुस यासे, नेपाःया सकले जनजाती छगु सुकाये घानातयेफत धाःसा राष्ट्र विकासयातः तःधँगु टेवा जुइफु धका, एनआरएन जपानया अध्यक्ष भबन भट्टया मन्तव्ययात सहमति केनादिल।
थथेहे भिन्तुना हसना देछायेगु झ्वले नवानादिसे, हिरोशिमा विश्व बिद्यालयया प्राध्यापक केशव महर्जनं, पृथ्वी नारायण शाहनँ मल्लकाले छेलातःगु नेपाल संवतयातः बिस्थापितयाना शक सम्बत लागु यात धाःसा, राणातेःसँ थः नेपाःमि (कुँवर) जूसाँनं फुक्क नेपाःमिते सिबे च्वयेला धका कुँवरँ राणा (राजपुत ), राणाँ शम्शेर (शक्तिशाली राजपुत) जुईतः झीगु निति जीवने प्रचलित बिहा, ब्रत, भोय् , नखःचखः, अस्टमी, पुन्हि, व संस्कृति नापँ क्वातुगु सम्बन्धँ नेपाल भूमिई जन्मजूगु नेपाःया मौलिक संवतयातः लिकाना सकल नेपाःमिपिनिगु छ्यने न्हुइतः हिन्दुस्तानया उज्जैनँ हःगु बिक्रम सम्बत यात छेलाहःगु इतिहास कनाँ दिल। निरंकुश शासनकाले नेपाल संवतया आन्दोलनँ सामन्ती ब्यवस्था लिकायतः लोकतन्त्रया लागि नेपाःमिपिन्तः जागृत यायेत तःधँगु योगदान याःगु खँ कनादिसे, गुकिइ नेवा: समुदायया बाहुल्यता दुसा थीथी नेपाःमि जन समुदायतेसँ ब्यूगु गुहालिँनं जनगणतन्त्रया उदय जुल। उकेँ, झीगु देसयानामँ देकातःगु नेपाल संवतयातः व्यवहारीक यायेगु नेपाःमि छम्हछम्हेसिया जिम्मेवारि खः धका धइदिल।
कोशी बाढि पीडिततेगु लागी सहयोग
भिन्तुनाया हसना देछायेगु ज्या क्वचायेके धुंकाः, कोशी खुसि बाःवया पीडित जूपिँनिया सहयोगार्थ, नेवा: जागरण मञ्चया पाखेँ १००,००० येन व दिदी बहिनि समाजया पाखेँ १००,००० येनया आर्थिक सहयोग मञ्चया महा सचिव सागर कपाली व दिदि बहिनी समाजया महा सचिव सुवर्णलता तुलाधरँ नेपाल राज्यदूत महामहिम डा.गणेश योन्जन तामाङयात लःल्हानादिल।
अन्तर्कृया ज्याझ्वले, मञ्चया अध्यक्ष सुनिल कुमार शाक्यँ नेपाल संवतयातः राष्ट्रीय संवतया मान्यता ब्यूगु लसताय् थथे अन्तर्कृया ज्याझ्वले ब्वतिकइदिसे खुशीयाली भोय झाया दीपिँ संघ संस्थाया प्रतिनिधिपिँ नेपाःमि व जपानि पासापिँ सकसितँ सुभाय् देछानादिल। विशेषयाना नेपाल सरकारयात मञ्चया पाखेँ कृतज्ञता प्वन्कादिसे, नेपाल संवतयात याकनं ब्यवहारे छेलायंकेतः नेपाल सरकारयातः माग तइदिल।
जपानि कलाकारपिनिगु नेपाःया नृत्य प्याखँ व नाँ जाःगु नेवाः संस्थाया दुजःत
ज्याझ्वःया निगुगू चरणे, लसताया भ्वय नापँ, जपानी कलाकारपिनिगु नृत्य प्याखँ पुचः मयुर ग्रूपँ, नेवा:, तामाङ, मगर व मेमेगु जातिया नृत्य न्ह्यथँगु खःसा, नेपालँनिसेँ झाःम्ह प्रतिशा शाक्यया नृत्यँनं सकसित न्ह्याइपुइका बिल। मञ्चया दुजः सविता कक्षपति कपालि मयजुँ न्ह्याकादीगु थ्व ज्याझ्वःले थकालि, युवा पुचःत व बःचाधीपिँ मस्तेगु ब्वतिनं उल्लेखनीयकथँ जूगु दु। अएनं नेवाःतेःगु नाँ जाःगु संस्थाया दुजःतेसँ धाःसा, युवा पुचःया ग्वसाले जूगुलीँला, थ्व ज्याझ्वले ख्वाः क्यँ मवःगुला, मफूगुला, मस्यूपि सकसिनं फलानाम्ह फलानाम्हला मवःनि हला धका हल्लाजूगु खँनं न्यनेदु। न्यनेदुकथँ, पुलापिँ नेवाःत पुलाँगु जमानाया कथँहे, न थःम्हँ यायेफु, न याइपिन्तः हःपाः बीफु, नेपाल संवतयात राष्ट्रीय संवतकथँ ब्यूगु थ्व मान्यतायात लयेताय् मफुपिँ जुयाबिल। थ्वला झीसँ सहयासाँ तबिनं इतिहासँला सहयाइगु खँ मखु। - The Newah
छिगु कमेन्ट् थन क्वसँ च्वयादिसँ। कमेन्ट् छकः जक च्वयादीसा गा।
