नेपाःमिया घाः गुलि
नेवाः जुजु मदयेवँ
म्वानाच्वन सिना सिना
संवत स्वच्या हायेवँ।।१।।
शाह वंश मदै धाःगु
झिंनिगूगु पुस्ताय्
न्यनातैगु स्वय् नं खन
गणतन्त्र वःगु झीथाय्।।२।।
नेवाः लयेता गुलिगुलि
नेवाः न्हंकीपिँ न्हना
पनातःगु जः न्यंकब्यात
महीपिँ महिता फुना।।३।।
नेपालमण्डल सः ज्वना
दन स्वः मंकाः जाना
वल सकलें नसँचा फाया
बिहाँचुलि म्ये हाला।।४।।
- बिनोद सायमि (आल)
तिथि - ने.सं. ११२८ यँलाथ्व २ (दुतिया), सोमवाः
त्रिरत्नयात नुगः मिखां खने
बुद्ध धर्म संघयात, नुगः मिखाँ खने
लँपु क्यना बिल बुद्धं, पलाः थःगु ल्ह्वने
दुःख गबलें मदेकिगु, लँपुइ न्ह्याः वने
मभिँ ज्या यायेगु त्वःता, भिं मुंकाः वने ।।
याःगु दःसा मभिं ज्या, ल्यू ल्यू वै व हे
ग्वाना च्वनी बुलुमि, छन्हु पुइ उकीँं हे
जन्म थुगु सितिं मछ्वय्, बांला ज्याय् छ्यले
फाकुगु माकु तायेका, दुःखय् क्वब्वाय् मते ।।
यचु नुगः भिं मतिपिं, पास्याना जुये
हाकु नुगः दुपिं ल्यू, गबलें जुइमते
त्यानु मचाय् प्यानु मजुइ, कुतः त्वःमफिके
मतिइ मभिं काय् मते, भिंगु मति दयेके ।।
- बिनोद सायमि (आल)
ल्हुति, येँ, नेपालमण्डल
ने.सं. ११२७ कौलाथ्व ९, सनिवा
******************************
मैत्री भाव
मैत्री भाव दुनुगलय् दयेका
सकल प्राणिपिं थःथें खंका
थःगु चित्तय् भिं भाव जायेका
मवयेके गबलें राग ज्वयेका ।।१।।
राग द्वेष मोह छुं मदयेके
मन वचन कर्म थःगु यच्चुके
चित्तया खिति तुइका सिला छ्वय्
अनित्य खः सकतां धैगु थुइके।।२।।
तँःयात सदां मैत्रीं त्याके
पापयात सदां भिंज्यां त्यले
मभिंगुयात भिंगुलिं त्याके
थःम्हं थःत नी* याना यंके।।३।।
द्वलँद्वः हताः त्याकेगु सिबे
थःके दूगु क्लेशयात त्याके
प्रज्ञा दयके, गुगुं पाप मयाय्
मनू जन्म थ्व मू वंगु थुइके।।४।।
न्हिया न्हिथं पुण्य मुंकाव वने
बांबांलाःगु स्वाँया माः हने
बुद्ध धर्म संघया लँपुइ वने
प्याः** चाइगु मू हा लेहेँ थने।।५।।
- बिनोद सायमि (आल)
ल्हुति, येँ, नेपालमण्डल
ने.सं. ११२७ कौलाथ्व ९, सनिवा
* शुद्ध
** तृष्णा
************************************
नेपाः झीगु देः झीगु प्राण
सासः दतले म्वाइ थ्वदेः
छिगु माया ममताया भरँ
मखुसा कन्हेहे मदया वनी
थ्वदेः हानाँ हे मदुगु जुया
नेपाल भास झीगु झीसँहे
धायगुसा नेवारी धका
अले गन थुइकी कतपिसँ
नेवारी मखु नेपाल भास धका
न्हना वनी न्हाँ हानाँ मदया
- सुव नेवाः “?”
Get free blog up and running in minutes with Blogsome
Theme designed by Viewfinder Design
